Sioqqat 'sikkilerunnarsipput'! Quiasaarutigalugu taama aallartissinnaavugut. Ilami illoqarfitsinni sioraqarnermik. Ukiumi soorunami takussaarpianngikkaluarput, upernarneraniilli ukioqqinnissaanut ukiut tamaasa takussaajuartarput. Ukiumiit ukiumut portusiartorusaarlutik.

Sioqqat piiarneqarneq ajoramik kusassaataanngivipput. Sumiginnagaasimasutut taasariaqarnerupput. Aqquserngit sinai ivigaqarfiugaluartut aasamilu qorsooqqittuusussaagaluartut siorarpassuarnit 'ipitinneqarput' uumassuseeruttutut isikkoqarlutik. Illoqarfipput taamaattariaqanngikkaluarpoq, pitsaassagaluaqaarlu taama qaleriiaaginnartitsineq iliuuseqarfigineqaruni sioqqallu tamaasa piiarlugit, nunatallu qorsooqqitsissinnaasut nunagissarlugit. Uninngatiinnarneriniit kusanarnerulissagaluaqaaq.