Aasit qimaannagaq

Brugseneeraq illoqarfiup qeqqaniittoq allineqarami iluaallaqaaq. Ajuusaarnartoraali allineqareernerata kingorna silataani biilinut unittarfik siornatigut asfalt-eqarsimagaluartoq qalleqqinneqaranilu qimaannarneqarmat. Panernartumi pujoralannikkaaqaaq inunnit angallaffiugami, biilillu unikaagaangamik pujoralassuaq siammartittarmassuk. Asfalt-eqarsimagaluartut peerneqaraangata kingornagut suliareqqinneqartarnissaat kommunep piumasarisariaqarpaa.

Aasaq ukiorlu

Sisimiut aasarluaraangami aputaarutiivittarpoq, ukiorluaraangamilu aputeqartaqaaq. Asseq qulleq junip 30-ani assilisaavoq allerlu novemberip 24-ani (2007).

Soormi piiaarneqartarunik

Ukiumi siorarterisarneq soorunami pisariaqartuassaaq illoqarfipput apportusarnermik. Sioqqalli ukiut tamaasa qaleriiaaginnartinneqartarnerisa kinguneraat nunatat ilaat naggorittartuugaluit siorarsuarnit kusanaallisinneqartarmata. Aqqusinersuup ilaata sinaani katersuutiinnarsimasut peerneqarsinnaanerat periarfissaalluaraluarpoq, iliuuseqarfigineqartanngillalli.

Katersuuttarfiusinnaasoq

GTO-pladsitoqaasimasoq narsartaagami tamassa katersuuttarfiliarissallugu piukkunnartorsuugaluartoq. Sanaartorfigineqarnissaa ilimananngilaq, nunami tamanna qaarsortaqarunanngimmat sanaartorfigineqaqqinngilaq. Narsartarli atorluarsinnaalissagaluarpoq nunagissarlugu narlortillugu suliarineqaruni. Ilusilersukkanik ivigakkanik naasussanngorlugu suliarineqarsinnaavoq ilaatigullu cement-nik flise-lersorlugu. Taamaalilluni aasami katersuuffiukutsoortalersinnaagaluarpoq.

Inneruularpassuaqaleraangami qalipaatigittaqaaq

Sisimiut aasami qorsooqqitsilluni kusatsikkaangami isigiuminartaqaaq, aasarissilluarneranimi nuna naalluaraangami inneruularpassuillu 'anillakkaangamik' illoqarfik kusatsittaqaaq. Qularnanngilaq nunatat isumagineqarluartarunik aasat tamaasa naggorittuaannarsinnaasoq.

Pisuttarfik sioraannaajunnaartitassaq

Brugsenip anginerup eqqaani aqquserngup sinaa pisuffissiaq ukiorpassuarni sioraannaajuarsimavoq panernartumilu pujoralannartaqaluni, pitsaassagaluaqaarlu tamanna kangimut ingerlavia asfaltimik imalunniit cementinik kippaarissukkaanik qallersorneqarsinnaagaluaruni, qallersornissaanummi periarfissagikkaluaqaaq.

Igitassat 'takuneqarsinnaanngitsut'

Pisiniarfeeraq Den Lille Butik aqqusinikkut saneqqutiinnarlugu eqqaa torerpoq, illutaatali tunuatungaa qulaaniit takugaanni tamaaniipput eqqagassat - qularnanngitsumik teqqartarsimasut - tamaangalu oqquiinnarlutik. Imaaliinnaq takussaanngikkaluarpataluunniit eqqarneqarunik pitsaanerpaagaluarpoq.

Peerlugit igiinnagassaagaluit

Umiatsiaaraatileqatigiit eqqaanni aqquserngup sinaani igitassat saviminikut, qisuit allallu qimaannagaasimasut ukiunilu arlaqalersuni uninngaannarsimasut tamaani kusanaaqutaaqigamik piaartumik peerneqartuugunik sumiiffik tamanna kusatsissagaluaqaaq.

Kuussiani sioraajaaneq

Aqqusinersuup sinaani kuuffissiat ukiorpaalunngortuni sioraajarneqartarsimanatik suliarineqariaramik kusatseqaat. Kuuffissialli sinaanni nunatat qorsooqqitsittartut sioqqanik suli qallersimaneqaqaat, pitsaassagaluaqaarlu nunatat tamakku ilanngullugit sioraajarneqarunik.

Assiaqutit piiginnagassaagaluit

Illoqarfiup qeqqani pølsebarip eqqaani assiaqutit cementimik sanaat, ukiorpaaluit matuma siorna ikkuteqqaaramik alutornarnikooqaat. Maannali nutaanngilisimapput ilaallu aserorlugit uppitinneqarsimallutik. Piipallakkunik pitsaanerugaluarpoq, taartissaannillu assiaqutsiisoqaqqissappat tulluartuunissat kaammattuutigiinnarneqarsinnaavoq.

Kuussiani sioraajaaneq

2010-p aasalernerani maluginiagassaavoq illoqarfimmi kuuffissiat sioraajarlugit - ilaatigullu ivigaajarlugit - suliarineqartut. Suliassanngorsimanerisa iliuuseqarfigineqarnerat nuannaarutissaavoq, soorlu Aqqusinersuup Glahnillu aqquserngisa sinaanni kuuffiit suliarineqarnerisa takutikkaat qanoq kusatsikkiartortigisut.

Ukioq alianaalligaangat

Sisimiut ukiumi alianaalligaangami nuannertaqaaq, ingammik suli issittarluni upernassariartulerluni qaamanertusileraangat. Februariugaa assilisat.

Aqquserngup sinaani pisuffissiat

Sisimiuni biilit amerliartorusaartuarmata aqqusinermi angallannikkut isumannaallisaaneq inerisartuassallugu pingaaruteqarpoq. Soorlu umiarsualiviup tungaanut aqquserngup sinaa sioraannaasoq pisuttarfiliassaqqissuuvoq. Pisuffigineqartaraluarpormi, kisianni pisuttut amerlanerit asfalti aqqutigisarpaat immaqa sioqqatigoorumanatik. Assimi qullermi takuneqarsinnaasutut pisuffissiarineqarsinnaasumi kalaalimineerniaq sioqqat nateralugit tuniniaavoq, panernartumilu biilit uneraraangamik pujoralak siammartertarpoq allaat tuniniakkat nerineqartussat pujoralatserlugit.

Biilinut unittarfiit

Sisimiuni niuertarfiit, allaffeqarfiit allallu silataanni biilinut unittarfii asfalterneqaratik sioraannarnik qallersimasut aasami panernartumi assut pujoralatsitsisarput. Pujoralannartarnersua pinaveersaassappat biilinut unittarfiit tamakku asfalterneqarunik iluaallassagaluaqaat, taamaaliornikkut illorsuit avatangiisaat suliarilluagaarpasittumik isikkoqalissagaluarmata. Assimi takuneqarsinnaasutut (qulaniit) Piareersarfiup, A/S INI-p, quersuup, Minngortuunnguup atuarfiata, Høka-p kiisalu Spar Quickip Qiviarfimmiittup silataat asfalterneqartariaqarput.

Naluara, uangattaaq-una takornariaasunga!

Sisimiormiut ilaat oqalulerpoq, illoqarfik tukappallaarnerarlugu, ingammik aasalernerani eqqagassakujuppassuit maaniinnarmiittut assut ajoralugit. Paasinartumik, illoqarfiup torernerusariaqarnera kusanarnerusariaqarneralu taakkartorpai, illoqarfippummigooq tikeraaqartaqimmat kusanarnerusumik nittarsaattariaqaraluarpoq. Qinngorlersimarpalungajattumik taama oqaloriarluni, saamarpalunnerulluni quianartunngortiinnarpaa: Namminerooq takornariat arlaannit unitsinneqarluni aperineqaraluaruni sooq illoqarfik taamak tukatsiginersoq, akiinnassagaluarpaagooq:
'Naluara, uangattaaq-una takornariaasunga!'. Uffalugooq taamak Sisimiormiuutigaluni :-)

Assatakoq qimaannagaq

Imeqarfiup eqqaani kaajallariaq assallugu ruujorinik ilisiffigineqallarmalli assataq sioqqanik qalliinnarlugu naammassineqarpoq, ajoraluartumik asfalteqqinneqarani. Taassuma tungaanut aqquserngup ilaani asfalti katagarnikoq assorsuaq aqqusinilutsitsivoq, pilertortumik iluarsisariaqaraluarluni. Aammami bussit kaajallaffigiuarpaat aqqusaartuaannaramikku, immaqa bussinut nutaanngisaataasarluni.

Sisimiut kangiatungaat aasami asiarsimaarfigissallugu periarfissalissuuvoq, taamaattorli aqqusinia - aqqusinertaarsuarmik taasagarput - aserfallatsaalineqarneq ajorpoq. Pitsaassagaluaqaaq aqqusinia nutaamik qallerneqarsinnaaguni, asfaltimiunngikkaluartoq, sioqqanilli aserortikkanik ujaraaqqanik akusanik. Taamaalilluni biilinik ingerlavigissallugu kajungernarninngussagaluarpoq immaqalu asiarfigineqarnerusalersinnaalluni.

Sisimiut aasaanerani sialoqarluarsimagaangami qorsooqqitsilertortaqaaq, soorlumi uku assit Asummiut Saqqaatalu nunataani naasut takutikkaat. Illoqarfiup avataatungaa aasami - aammami ukiumi - asiarfissarpassuaqarami ornigarneqarluartaqaaq. Kaammattuutigineqaannarsinnaavorlu eqqagassanik maangaannaq eqqaasoqartassanngitsoq. Augustiugaa assilisat.

Aqqusinersuarmiit oqaluffitoqqap tungaanut pisuinnaat aqqutigisartagaat sioraannaasoq ukiorpassuarni aqqutigineqartuareermat sulilu aqqutigineqartuassalluni, soormi suliarilluakkamik aqqusiorneqaruni silinnerulaanngorlugu. Aqqut sioraannaajunnaarlugu suliarineqarsinnaagaluarpoq. Minnerunngitsumik ikaartarferalaa sequmiinnarnikoq ingerlaannaq peertariaqaraluarpoq kiisalu isumannaatsumik aserujaannerusumillu ikaartarfilerneqarluni.

Sisimiut qorsooqqitsikkaangami qorsooqqilluartaqaaq, aasallu tamaasa taamaallaqunartaraluarluni. Ukiumili siorarterutikut piiarneqartannginnamik taamarsuaq qorsooqqitsippiassaariartulerpoq, tamannalu allanngortittariaqarpoq. Juliugaa assilisat.

Butik Inuk atisarsinianit ornigarneqarluartarpoq, nioqqutissaataimi amerlasuunit pilerigineqartarput. Atisaarniarfiup silataa asfalternikuugami ajunngeqaaq, ajuusaarnartumilli aasit-taakku sioraralaat asfaltimi qaleriiaatiinnaleqqapput. Piginnittuanut sulisuinullu siunnersuutigerusunnarpoq sioqqat piiarneqassasut kingornalu asfalti tamaat imermik seqqartarneqassasoq. Taamaalippat atisaarniarfik iseriartorfigissallugu suli pilerinarnerulissagaluaqaaq.

Aqqusinersuarmiit Nuunnguup tungaanut sangoriap sinaani nunataq. Qulliuvoq 2010-mi junimi assilisaq, alliuvorlu 2005-mi julimi assilisaq. Nunataq sioraqarpiarani aasami naggorissilluartartuuvoq inneruularpassuaqartarluni. Nunatarli maanna sioraqarnermik qorsooqqitsippiassaarpoq inneruulallu ikinnerullutik puttussuuttalerlutik. Sioraajarneqaraluaruni qularnanngilaq qorsooqqitsilluartalissasoq inneruularpassuaqartaleqqillunilu.

Nasaasaaq Sisimiut illoqarfiata ilisarnaatigilluarpaa 'kiinarpassuaqarlunilu'. Qaqqarsuaq 775 meterinik portussusilik, ukiumi aasamilu seqerngup qaamarngata assigiinngitsorpassuarnik qalipaateqalersittarpaa. Novemberiugaa assilisaq.

Aqqusinigissaaneq pingaartuusariaqarpoq. Sanaartornermik Ilinniarfik Nunatsinni ilinniarfinni pingaaruteqarluinnartuuvoq, inuusuttorpassuimmi inersimasullu ilinniarfigisarpaat. Ajuusaarnaraluartumilli Adammip aqqusernganiit ilinniarfiup isaariaata tungaanut aqqusinia maniilakuluttorsuuvoq ilinniarfiup sannaata isikkuanut tulluartuunngiivilluni. Silinnerusunngorlugu asfaltilerlugulu suliarisariaqarpoq, ilami ukiuni arlaqalersuni iluarsineqannginnami kusanaalliartuinnarpoq.

Allagarsiivik sumiginnagaq? Ajuusaarnartaqaaq allagarsiivik taamatut isikkoqartillugu atorneqartarmat. Atuisut immaqa maangaannaq eqqaarusuttanngeruttorlutik, allagarsiussat atorunnaarsimasut maangaannaq igittarpaat. Pitsaassagaluaqaaq pappialakuusivimmik eqqaanut inissiisoqarsinnaagaluarpat, atuisartullu isumaqatigiissutigalugu atortunnaartut pappialakuusivimmut igittassagaat. Maangaannaq igitaaneranniit allagarsiivik eqqaalu kusanarnerussagaluaqaat.

Soormi iginneqapallaannarunik? Savimikorsuit maangaannaq qimanneqarsimasut kusassaataanngivipput, atorunnaarneqaramillu ingerlaannaq peersimasariaqaraluarput.

Ukiup kaajallakkiartornerani Sisimiut qalipaaterpassuaqartarpoq, kusanartumik qilaqartarluni. Avatangiiseq taamaaligaangat, nunarsuattalu silaata allanngorartarnera malunnarluartumik Sisimiuni takusinnaagaangatsigu isigisaq kusanartaqaaq. Martsiugaa assilisaq.

Pissutsit taamaattariaqanngillat! Bussit unittarfianni utaqqisut issiaviginiagaat aserorneqarsimasoq takullugu nikalluallannaqaaq. Sooq aserorterisarnerit illoqarfitsinnik kusanaallisaataassappat? Pissutsit taamaattut unittariaqarput, aserorterisarnerlu ileqqorluttuliorneruvoq iluarsisariaqartoq.

'Tamaaniuna igasoqarsimasooq?' Kissarsuutikorsuaq Qiviarfimmi maaniinnarmiittoq takujuminarsaataanngilluinnarpoq. Uffaluunniimmi maangaannaq ilinagu eqqaavimmut ingerlanneqarsimaguni. Pigisat atorunnaakkat, ingammik taama angissusillik, akisussaaffeqartumik apuuffissaanut isumagineqartarnissaat ileqqorilertariaqarparput, maangaannaq igittarnagit.