Meeqqerivik Kanaartap tungaaniit, siornatigullu kolligiesimasut tungaannut kimmut narsartaq annertoorujussuaq qularnanngilaq sanaartorfigineqarnavianngitsoq, nunataami qaarsoqarfiorpasinnginnami ukiorpassuanngortunik sanaartorfigineqanngilaq.

Nunatsiarsuaq tamanna park-itut ilusilersorlugu assigiinngitsorpassuartigut aasaanerani atorluarneqarsinnaavoq, nuna narlorissarlugu, pisuttarfinnik aqqutilersorlugu, sumiiffiillu ilaanni meeqqanut inuusuttuaqqanullu sammisassaqarfinnik pilersitsivigalugu. Assersuutigalugu skateboardertarfik rampe, cykelinik mountainbike-nik sukkaniuttarfik, meeqqanut anginerumaanut mikinernullu pinnguartarfiit, allarpassuillu isumassarsiaasinnaapput.

Sisimiut kusanarli!

Sisimiut kusanarli! Qulequtaq erseqqippoq, nassuiaqqinnerusinnaagunanngilaq. Nittartagaq una aqqutigalugu illoqarfik Sisimiut kusanarnerulersinniarlugu paasititsiniutaassaaq.

Sisimiut Nunatsinni illoqarfiit annersaata aappaatut inissisimagami inuppassuaqarpoq, tikeraartartullu amerlasaqaat. Illoqarfik tikikkuminartuullunilu takujuminartuussaguni nunarsuup sinnerani illoqarfippassuit kusanartut ilusiligaalluartullu nallersuussinnaasariaqarpai. Ullumikkulli ajuusaarnaraluartumik Sisimiut illoqarfippalaanngitsorujussuuvoq naak ineriartornera alliartorneralu ingerlaavartuugaluartut.

Illoqarfik Sisimiut assitigut nittartakkami uani nittarsaanneqassaaq, illoqarfiup ilusilersornerani iluarsisariaqarsorisat saqqummiunneqartassallutik, minnerunngitsumilli uparuarneqartassallutik, soorunami iluarsiivigineqarnissaannut isumassarsiuutaasumik.

Nittartagaq nutaajuvoq, 30. maj 2010 pilersinneqarluni. Taamaammat assit oqaasertaliussallu ikkussorneqaruusaartassapput.

Nittartakkamik alakkaasutit illit, minnerunngitsumik Sisimiuni najugaqaruit, siunnersuutinik oqaaseqaatinillu tunniussaqarnissannut periarfissaqarputit, kommentar allaffigalugu (allassaguilli blogger.com-imi nalunaarsimasariaqarputit).